I sun na dita a conduziun familiara, tl setur termoidraulich dal 1964. Cun 60 agn d’esperiënza se desfarenziunse por la cualité y l’afidabilité de nüsc produc, la formaziun tresfora de nüsc colaboradus, la puntualité di sorvisc y n’assistënza ai cliënc tres presënta.
I chiriun n responsabl tecnich por manajé y coordiné i laurs de nüsc cantiers. La figöra ideala á competënzes tecniches solides y esperiënza da gestí proiec, la contabilité de cantier y la suravijiun dles scuadres operatives. I pitun n ambiënt de laur dinamich, cun poscibilités da crësce profescionalmënter y da se formé inant. Sce t’es interessé da fá pert de nosta scuadra mënesse to curriculum.
Sciöche firma de familia ti dunse na gran importanza ala formaziun y al svilup de nüsc dependënc. Por chësta rajun chiriunse n lerner che acompagnará n tecnich espert tratan istalaziuns, manutenziuns y reparaziuns. Mëna to cv/diplom. Ion te tolunse sö te nosc team y t’acompagnunse te tüa chersciüda profescionala.
I pitun implanc de scialdamënt proietá y realisá sön mosöra por abitaziuns, locai comerziai, industriai y publics. Vigni soluziun é personalisada por garantí le majer comfort poscibl y na efiziënza energetica ezelënta. I laurun ince cun fontanes d’energia alternatives sciöche le sorëdl, la biomassa, pumpes dal cialt y la geotermia, anuzan elemënc naturai zënza incuiné, pitan insciö soluziuns sostignibles.
La ventilaziun é fondamentala por garantí na cualité dl’aria otimala y evité maraties dla respiraziun liades a na stleta zircolaziun dl’aria, sides te ambiënc abitatifs co publics. Nüsc sistems straverda da umidité, müfes y alergies, assiguran n ambiënt sann. Nüsc tecnics fej regolarmënter manutenziun y mantëgn i implanc tres nëc y efiziënc. Fossel mo ora da mudé aria?
Pro Termo Clara proietunse y istalunse zones relax y wellness sön mosöra por SPA, hotí y privac. I pitun consulënza tecnica, proietaziuns detaiades y istalaziuns di implanc grantin cualité y dorada tl tëmp.
L’implant idrosanitar é na pert indispensabla de vigni abitaziun, che garantësc la destribuziun de ega cialda y frëida, da bëre y nia, tres na rëi de ros y aparac. Implü condüjel les eghes pazes devers dla rëi dl’ega de desćiaria. Chësc implant fondamental mirita na majera consapevolëza y valorisaziun por süa gran importanza te nosta vita da vigni de.
I sun a desposiziun 24/7, 365 dis al ann, por assistënza tecnica y suport post-istalaziun por ci che reverda la manutenziun, baraté fora toc, pordüdes y controi. Chësc sorvisc é resservé a nüsc cliënc.
Nosc termotecnich fistidiëia dla planificaziun y dla gestiun completa dles operaziuns de manutenziun por garantí l’efiziënza energetica de üsc sistems, contribuin a sparagné sön le consum y sön i cosć.
I ofriun:
Cun plü co sessant’agn d’esperiënza, unse afiné nostes competënzes de termoidraulica cun pasciun y dediziun. Cun n team de diesc colaboradus, idraulics y tecnics, sunse deventá n punt de referimënt tl setur, arjigná da respogne ales esigënzes de privac y dites. Cun nosc impëgn unse consolidé nosta presënza tla Val Badia, te Gherdëna y tla Val de Puster.
La consulënza tl mëteman é le pröm vare por arjigné ca n proiet. Cun soluziuns personalisades, gnarëise acompagná da nosc team por ciafé ci che passenëia deplü cun ostes esigënzes personales, otimisan tëmp y cosć tratan la fasa de costruziun.
Tres le sorvisc de proietaziun, gestiunse vigni fasa de osc proiet, dala ideaziun ala realisaziun finala. I coordinun vigni detai por garantí n prozes linear y n resultat final de gran cualité.
I ofriun soluziuns de istalaziun che vá dai sistems tradizionai a chi de avanaguardia, adoran ma materiai dles mius marches che nes vëgn aconsiá da nüsc partner de crëta. Nosta scuadra, tresfora ajornada y formada, garantësc döta la funzionalité di implanc istalá.
A nüsc cliënc ti pitunse n sorvisc de assistënza 24/7 ponsé por ves dé trancuilité y segurëza. I sun a desposiziun por respogne a ostes domandes, manajé emergënzes y ves dé suport tecnich da dalunc o söl post, assiguran che üsc implanc funziones demeztrú.
La manutenziun regolara é essenziala por presservé la dorada y l´effiziënza di implanc. Nosc program tol ite ispeziuns periodiches, netijia y calibraziun, por individué y sistemé problems denant co ai devëntes gauja de majeri desturbs, assiguran n funzionamënt otimal tl tëmp.
